Жештините и киселиот дожд го изедоа ајварот во Струмица

Пиперките буквално се изгорени, а оние земјоделци кои ја произведуваат под пластеници можат да се надеваат на добра откупна цена.

Осумдесет отсто од посевите засеани со пиперка ајварка се уништени, а причината за тоа според познавачите, е топлото и сушно лето надополнето со неодамнешниот кисел дожд.
Според д-р Ристо Вучков, стручњак за заштита на растенијата, годинашниов оптимизам од зголемените површини под пиперката од сортата „куртовска капија“ и зголеменото побарување за неа од европските пазари, во последните десетина денови се урна како кула од карти. На површините штетите се огромни, а производителите со неверување гледаат како пропаѓа нивниот труд.

– Прво во фазата на оплодување на пиперката поради жештините имаше лошо заврзување на плодот. Тие плодови кои беа на јужна експозиција и беа оплодени, буквално изгореа од високите температури. Ова е првата причина за големата штета врз „ајварката“, а втората е дождот кој врнеше неодамна. Имено, тој поради својата киселост предизвика бактеријални и вирусни заболувања на недоволно заштитените растенија – објаснува д-р Вучков.

Тој додава дека земјоделците се уште го немаат потребното ниво на знаење како превентивно и навремено да ги заштитат посевите.

И земјоделците потврдуваат дека жештините и киселиот дожд го изедоа ајварот од нивите во Струмичко, посебно од површините на отворено.