Како со помош на штурците да ја пресметате температурата во воздухот

Можеби сте забележале дека интензитетот на звукот од штурците во природата никогаш не е постојано ист, туку зависи од температурата на воздухот.

Меѓутоа, она што сигурно не сте го знаеле е тоа дека таа меѓусебна зависност на звукот на штурците од температурата на воздухот е толку прецизна што штурците можат да се користат како природни термометри.

Постои дури и таканаречен Долбеаров закон кој во 1897 година го дефинирал Амос Долбеар, американски физичар и иноватор, а кој јасно ја утврдува спрегата помеѓу динамиката на звукот од штурците и температурата на воздухот. Потребно е само да го изброите бројот на испуштени звуци на штурецот во една минута (N) и да го вметнете во едноставната формула:

T=10+(N-40)/7

Најдоверливи во мерењето на температурата на овој начин се северноамериканските штурци Oecanthus fultoni, но формулата апроксимативно важи и за обичните полски штурци. Ако горната формула ви е малку повеќе комплицирана за секојдневно практикување, можете да ја користите и поедноставната верзија:

T=5+N’

каде N’ означува број на звуци од штурецот за осум секунди.

Долбеаровиот закон, помеѓу другото, се споменува и во популарната хумористична серија The Big Bang во епизодата наречена The Jiminy Conjecture, во која Шелдон и Хауард се натегаат околу видот и името на штурецот кој влезе во станот на Шелдон. Во видеото подолу е дадена формулата која важи за мерење на температурата во фаренхајти.

Извор: weather4all.com