Мали дрвени острови лебдат во пристаништето во данската престолнина Копенхаген. Наменети како дел од проектот Копенхаген Острови, островите ќе бидат нов јавен простор и вистинска атракција за жителите и посетителите на овој европски град.
Австралискиот архитект Маршал Блехер и дизајнерот Магнус Маарберг од студиото Фокстрот го создадоа првиот од многуте острови на идниот Паркипелаг. Наречен „CPH-Ø1“, островот е дрвена платформа од 20 квадратни метри каде е засадено еднa липа.
Островот е изграден под рака во еден од бродоградилиштата во Копенхаген, користејќи традиционални техники за градење на брод и локални материјали. Тој е исто така надополнет со рециклирани пластични шишиња што се вградени во платформата.
„Паркипелаг“ ќе има вкупно девет острови, кои ќе служат како вонредни плоштади наменети за собири и креативни настани. Овие плутачки зелени зони ќе донесат нова енергија во пристаништето и ќе ги оживеат заборавените делови од градот.